Заңды сақтау – әр азаматтың жауапкершілігі

Қоғамның тыныштығы мен елдің тұрақты дамуы ең алдымен заң үстемдігіне байланысты. «Заң және тәртіп» қағидаты – азаматтардың қауіпсіздігін қамтамасыз етіп, құқық бұзушылықтардың алдын алуға және қоғамда жауапкершілік мәдениетін қалыптастыруға бағытталған маңызды ұстаным.

Заң – баршаға ортақ. Әлеуметтік жағдайына, жасына немесе қызметіне қарамастан әр адам қолданыстағы заң талаптарын сақтауға міндетті. Қоғамдық орындарда тәртіп сақтау, жол қозғалысы ережелерін орындау, бөтеннің мүлкіне зиян келтірмеу, қоршаған ортаны қорғау сияқты қарапайым талаптардың өзі қоғамдық қауіпсіздікке тікелей әсер етеді.

Құқық бұзушылықтың алдын алу мақсатында елді мекендерде профилактикалық рейдтер мен түсіндіру жұмыстары тұрақты жүргізіліп келеді. Мұндай шаралардың басты мақсаты – азаматтарды жазалау емес, құқық бұзушылыққа жол бермеу, заң талаптарын түсіндіру және тұрғындардың құқықтық сауаттылығын арттыру.

Бұл бағытта жастармен жүргізілетін жұмыстардың маңызы ерекше. Жастардың заңды білуі, өз құқықтары мен міндеттерін түсінуі және қоғамдық өмірге белсенді араласуы – болашақта құқықтық мәдениеті жоғары қоғам қалыптастырудың кепілі. Жас буын арасында пікірсайыстар, кездесулер және түрлі акциялардың ұйымдастырылуы осы мақсатқа қызмет етеді.

Сонымен қатар қоғамда құқық бұзушылыққа «нөлдік төзімділік» қағидатын қалыптастыру маңызды. Ұсақ құқық бұзушылықтарға немқұрайды қарау кейіннен күрделі мәселелерге әкелуі мүмкін. Сондықтан әр азамат қоғамдық тәртіпке жауапкершілікпен қарап, заңсыз әрекеттерге жол бермеуге және қажет жағдайда тиісті органдарға хабарлауға тиіс.

Заң мен тәртіп – қауіпсіздіктің ғана емес, өзара құрмет пен сенімнің негізі. Әр азамат өзінен бастап заң талаптарын сақтаған кезде ғана әділетті, қауіпсіз және тұрақты қоғам құруға мүмкіндік артады.

Айгерім Айдарбекқызы