2025 жылдың соңғы 5 айында Жетісу облысының Сауда және тұтынушылардың құқықтарын қорғау департаментіне азаматтардан 407 өтініш түсті. Оның 130-ы бойынша құқықтық көмек көрсетілсе, 213-іне түсіндірме жұмыстары жүргізілді. 16 тұтынушы сотқа талап арызбен жүгінген.

Ең көп шағымдар бөлшек және онлайн саудаға, тұрғын үй-коммуналдық қызметтер мен тұрмыстық қызмет көрсету салаларына қатысты тіркелген. Интернет-платформалардың белсенді дамуына байланысты Kaspi, Wildberries, OZON және басқа да сервистерге байланысты шағымдар саны артты.

Сауда саласында 7 профилактикалық іс-шара мен бірнеше жоспардан тыс тексеру жүргізілді. Негізгі құқықбұзушылық – әлеуметтік маңызы бар тауарлардың бағасын негізсіз көтеру. Нәтижесінде 120-дан астам кәсіпкерлік субъектісі жауапкершілікке тартылып, салынған айыппұлдардың жалпы сомасы 2 миллион теңгеден асты.

Тұтынушылардың құқықтарын қорғау аясында жүргізілген тексерулердің барлығында заңбұзушылықтар анықталды. Соның нәтижесінде әкімшілік істер қозғалып, ескертулер мен айыппұл санкциялары тағайындалды.